Rruga e suksesit të KF Dardania SG, për një dekadë në Ligën e Dytë Ndër-Rajonale

Klubet shqiptare në Zvicër vazhdojnë të korrin suksese

KF Dardania SG të shtunën pasdite ka arritur një sukses të madh. Skuadra shqiptare nga Liga e Dytë Rajonale është ngjitur në Ligën e Dytë Ndër Rajonale.

Presidenti i klubit, Eduard Oroshi në një intervistë për albinfo.ch, ka treguar për vështirësi, suksesin, por edhe synimet.

“Suksese ka qenë i vështirë, sidomos në ndeshjet e fundit, ku patjetër është dashur të fitojmë. Ka qenë një gjendje emocionale te lojtarët, por edhe tek të gjithë. Megjithatë, ia kemi arritur që me sukses të ngjitemi një ligë më lart”, është shprehur Oroshi për albinfo.ch.

Suksesi është i veçantë për klubin shqiptar. “Ne kemi 10 vjet që jemi themeluar. Kemi kërkuar lojtarë që angazhohen. Pra, të familjarizohen me klubin. Në St Gallen është një sukses i madh, pasi jemi vetëm klubi i tretë që është në një ligë kaq të madhe. Kjo na jep shumë krahë, emocione dhe forcë për të vazhduar më tutje. Gjithashtu ka rëndësi edhe për shqiptarët që jetojnë këtu. Organizimi është i rëndësishëm, tipik si zviceran. Kemi dashur të bëjmë diçka të suksesshme. Jemi shembull si duhet të udhëhiqet një klub”, shtoi tutje Presidenti i KF Dardania SG.

Në fund flet edhe për synimet. “Qëllimi është që jo vetëm të mbesim në këtë ligë, por të ngjitemi edhe më lart. Do të bëjmë edhe disa përforcime, por duke ruajtur boshtin e skuadrës. Pra, 2-4 përforcime. Pa shikues, pa sponsorë, pa tifozë nuk do të ishim këtu. I falënderoj të gjithë. Të gjithë na kanë ndihmuar duke dhënë kontributin e tyre”, përfundoi Eduard Oroshi.

---