Berisha thotë se Rama është kundër Kurtit

Kryetari i Partisë Demokratike në Shqipëri, Sali Berisha, ka thënë se kryeministri Edi Rama, është kundër homologut të tij kosovar Albin Kurti.

Gjatë fjalës së tij në mbledhjen e Këshillit Kombëtar, Berisha hodhi akuza ndaj kreut të qeverisë duke thënë se po kërkon të amnistojë krimet serbe në Kosovë, raporton Albinfo.ch.

“Edi Rama në qëndrimin ndaj Aleksandër Vuçiqit dhe Beogradit, shkelmon mbi gjakun e dhjetëra mijëra shqiptarëve vetëm në luftën e fundit. Çfarë je ti zotëri, na thuaj, që kërkon të arkivosh gjenocidin dhe krimet e luftës që ka kryer Serbia në Kosovë. Çfarë autoriteti ke ti përveç skllavërisë ndaj Vuçiqit. Si mund ta bësh një gjë të tillë. Shpjegojua shqiptarëve, janë 1500 fëmijë të djegur të gjallë, të vrarë, të therur në luftën e fundit, ka thënë Berisha.

Tutje Berisha ka thënë se në cilin traktat, ligj ndërkombëtar është shkruar që gjenocidi dhe krimet kundër njerëzimit të mos konsiderohen. “Vetëm në vasalitetin tënd ndaj Vuçiçit janë të shkruara këto”, deklaroi Berisha./Albinfo.ch/