Raporti i Komisionit Evropian që ‘godet’ Serbinë

Raporti i hartuar nga eurodeputeti kroat, Tonino Picula, u aprovua me 49 vota pro, pesë kundër dhe tetë abstenime

Evropës duket po i soset durimi me lojën me “dy porta” të Serbisë. Teksa miratoi raportin e strategjisë së re të Zgjerimit, Komisioni i Politikës së Jashtme të Parlamentit Evropian kërkoi që negociatat e anëtarësimit të Serbisë në bllok, por edhe dhënia e fondeve të BE-së, të kushtëzohet tanimë me mbështetjen e Beogradit për sanksionet ndaj Moskës, shkruan TCH, transmeton albinfo.ch.

“Prioritet duhet të jetë përshtatja e vendeve të përfshirë në procesin e zgjerimit me politikën e përbashkët të jashtme dhe atë të sigurisë së Bashkimit Evropian. Negociatat e anëtarësimit me Serbinë të avancojnë vetëm nëse ajo u bashkohet sanksioneve të BE-së ndaj Rusisë dhe arrin një progres të qënësishëm në reformat e nevojshme për integrim”, thuhet në raporti e PE-së.

Shumë më i drejtpërdrejtë, raporti këtë herë parashikon një reformim të procesit të zgjerimit me një mekanizëm të qartë: shpërblim për vendet që avancojnë në përmbushjen e kritereve, sanksionim për ata që mbeten prapa.

Raporti i hartuar nga eurodeputeti kroat, Tonino Picula, u aprovua me 49 vota pro, pesë kundër dhe tetë abstenime. PE-ja, përmes raportit për strategjinë e zgjerimit, po ashtu ka propozuar që të ndryshohet mënyra e miratimit të vendimeve, duke hequr dorë nga unanimiteti për të kaluar në votim me shumicë të kualifikuar në Këshill, ndërsa kujtohet sesi besueshmëria e procesit të zgjerimit, por edhe i BE-së në tërësi, është dëmtuar për shkak se disa shtete anëtare, për shkak të interesave kombëtare e kanë bllokuar këtë proces.

---