Në Beograd protestohet kundër normalizimit me Kosovën

Rrugëve të Beogradit qindra nacionalistë e të krishterë ortodoksë protestuan të dielën kundër planit evropian që synon normalizimin e marrëdhënieve mes Kosovës e Serbisë.

E kjo pikërisht për faktin se shumë serbë e shohin Kosovën si zemrën e kombit të tyre, aty ku ndodhen kishat e manastiret kryesore.

“Populli i Serbisë që leu këtë tokë me gjak nuk do ta lëshojë Kosovën serbe, sepse Kosova është e shenjtë”, tha Zorica Mojsic nga Beogradi për Reuters, përcjell albinfo.ch.

Nacionalistët serbë kanë kritikuar edhe presidentin Aleksandër Vuçiç për rolin e tij në bisedimet mbi një marrëveshje në kuadër të planit evropian.

Më 27 shkurt, Kryeministri i Kosovës Albin Kurti dhe Presidenti serb, Aleksandër Vuçiç, nga Brukseli deklaruan se e kanë pranuar planin bazë për normalizimin e marrëdhënieve, por nuk nënshkruan asgjë.

Kjo pritet të bëhet më 18 mars në Ohër, ku palët do të vazhdojnë diskutimet edhe për planin e zbatimit.