Presidenti zviceran mbron neutralitetin dhe thekson të drejtat e njeriut

Presidenti zviceran Alain Berset thotë se neutraliteti zviceran duhet të ruajë elementet e tij qendrore, veçanërisht një përkushtim ndaj ligjit humanitar dhe të drejtave të njeriut.

Presidenti zviceran Alain Berset thotë se neutraliteti zviceran duhet të ruajë elementet e tij qendrore, veçanërisht një përkushtim ndaj ligjit humanitar dhe të drejtave të njeriut.

“Armët zvicerane nuk duhet të përdoren në luftëra”, tha Berset për gazetën NZZ am Sonntag, përcjell Albinfo.ch

Megjithatë, ai tha se këto parime janë më të rëndësishme se kurrë, edhe nëse neutraliteti duhet të përshtatet.

“Ne duhet të pyesim veten se ku do të qëndrojmë si vend, ku do të qëndrojë Evropa pas pesë, dhjetë apo 30 vjetësh. Çdo gjë që vendosim sot duhet të matet me këtë matës,” tha ai.

Duke iu referuar luftës në Ukrainë, Berset tha se është e nevojshme të ripërqendrohet në elementët themelorë të neutralitetit.

Një nga çështjet kryesore për Zvicrën duhet të jetë se çfarë mund të bëjë për të mbrojtur popullsinë civile në Ukrainë, shtoi ai në intervistë.

“Të jesh neutral nuk do të thotë të jesh indiferent,” tha ai.

Berset tha se Zvicra është e përkushtuar fuqishëm dhe ka miratuar shumë shpejt sanksione të paprecedentë ndërkombëtare, tha ai. 

“Po ashtu po bëhen përpjekje në vetë Ukrainën, për shembull në fushën e pastrimit të minave”, vazhdoi Berset.

Ai tha se është i shqetësuar për “një furi luftarake” midis disa njerëzve, por “kjo ndjenjë bazohet në një vizion afatshkurtër,” tha ai.

Berset tha se Zvicra kishte një debat të gjatë rreth eksporteve të armëve disa vite më parë dhe parlamenti miratoi një reformë ligjore.  “Ajo që na duhet tani është stabiliteti”, tha ai.

Zvicra është një partner i besueshëm dhe pozicioni i saj “përgjithësisht” kuptohet mirë, shtoi ai në intervistë.

I pyetur për kritikat e vendeve të tjera ndaj qëndrimit të Zvicrës, Berset tha se e respekton faktin se “vendet e tjera kanë një qëndrim tjetër. Por duhet respektuar edhe qëndrimi zviceran”.

Por, ai përsëriti se Zvicra nuk mund të ndryshojë politikën e saj në një njoftim të shkurtër pa marrë parasysh bazën aktuale ligjore.

Ai gjithashtu paralajmëroi kundër heqjes dorë nga neutraliteti pasi kjo do të kishte ndikim në rolin e Zvicrës si vend pritës për organizatat ndërkombëtare në qytetin e Gjenevës dhe si ndërmjetës.

“Ndonjëherë kam përshtypjen se në Zvicër nuk jemi mjaftueshëm të vetëdijshëm për rëndësinë qendrore të Gjenevës,” tha ai./Albinfo.ch/

---