Donjeta Sadikut i mohohet për herë të tretë pjesëmarrja në Botërorin e boksit

FB: Federata e Boksit te Kosoves

Boksieres kosovare, Donjeta Sadikut po i mohohet për herë të tretë një e drejtë elementare – pjesëmarrja në Kampionat Botëror.

Në fakt, India nuk e njeh Kosovën si shtet dhe Qeveria e këtij vendi nuk po pranon ta pajisë garuesen kosovare me vizë të këtij shteti.

Prandaj, boksieria shpresoi deri sot, në ditën e fundit kur edhe do të duhej të nisej për në Indi, por nuk ka marrë përgjigje dhe shpresat dhe ëndrrat iu shuan.

“Nuk kam marrë ende përgjigje nga India. Federata e Boksit të Indisë e ka lejuar pjesëmarrjen time në Botëror dhe IBA ka thënë se nuk do të ketë problem nga Qeveria e Indisë, ndërsa ministria e jashtme e këtij vendi nuk është përgjigjur ende rreth aplikimit tim për vizë”, deklaroi Sadiku për një medium indian.

“Ministri ynë i Sportit po mundohet të kontaktojë me ta, por i kemi humbur shpresat. Të hënën është dashur të udhëtonim, pasi i kishim blerë biletat, por nuk kemi marrë përgjigje”, shtoi Sadiku.

Federata e Boksit të Kosovës ka paralajmëruar se do t’ju dërgojë letra krejt Federatave botërore, për t’i njoftuar për padrejtësitë që po i bëhen garueses kosovare.