Besimtarët myslimanë nisin haxhin këtë të diel

Ilustrim, Pixabay

Këtë të diel në Mekë besimtarët myslimanë nisin Haxhin. Pas tre vjetëve kufizime të pjesëmarrjes për shkak të pandemisë, të gjithë besimtarët myslimanë këtë vit mund të udhëtojnë për në Mekë.

Haxhi është një nga pesë shtyllat e Islamit, përbëhet nga një sërë ritesh fetare që do të kryhen për disa ditë në Mekë, qytetin më të shenjtë të kësaj feje dhe rrethinat e saj, përcjell albinfo.ch.

Për të shkuar në haxh kushton rreth 4500 franga për person.

Autoritetet e Arabisë Saudite shpresojnë që këtë vit t’i afrohen pragut të 2.5 milionë pelegrinëve, nga 160 vende, pasi kanë mirëpritur 926,000 vizitorë në vitin 2022, shkruan RTS.

Pelegrinët do të udhëtojnë të dielën në mbrëmje për në Mina, rreth pesë kilometra nga Xhamia e Madhe, përpara ritit kryesor në malin Arafat, vendi ku profeti Muhamed thuhet se ka mbajtur predikimin e tij të fundit.

Temperaturat e larta, rreth 45 gradë, përfaqësojnë një sfidë në rritje për autoritetet, të cilët kanë instaluar qendra të shumta shëndetësore dhe kanë vendosur 32,000 mjekë ndihmës. Duke patrulluar në këmbë nën çadra të bardha, policia gjithashtu spërkat me ujë pelegrinët, përcjell albinfo.ch.