Austria njeh patentë shoferët e Kosovës

Lulzim Pllana, ambasador i Republikës së Kosovës në Austri

Patentë shoferët e qytetarëve kosovarë do të njihen edhe në Austri.

Fillimisht këtë e ka bërë të ditur deputeti i Parlamentit Evropian, Lukas Mandl.

Mandli ka thënë se vendimi është marrë në Këshillin e Ministrave të Austrisë, por që tani duhet të kalojë në Parlament.

E lajmin për njohjen e patentë shoferëve të Kosovës e ka konfirmuar për albinfo.at edhe ambasadori i Kosovës, Lulzim Pllana. Ai ka thënë se vendimi nga Këshilli i Ministrave të Austrisë është marr me 14 qershor 2023, por çeshtja e zyrtarizimit duhet të kaloj edhe në instanca tjera, si: në Parlamentin austriak dhe Ministrinë e Mbrojtjes. “Zyrtarisht patentë shoferët e Kosovës pritet të njihen nga data 1 shtator. Megiithatë, ne jemi në kontakt të rregullt me zyrtarët austriak për të gjetur një zgjidhje, që ata persona të cilët hynë në Austri me patentat e shoferëve të Kosovës deri në shtator, mos të gjobiten“, ka theksuar ambasadori Pllana për albinfo.at

Tutje ambasadori ka sqaruar se patentë shoferët do t‘iu njihen qytetarëve të Kosovës të cilët janë për vizitë në Austri, atyre që kalojnë tranzitë në Austri, atyre që kanë qendrim të përkohshëm në Austri, pra që punojnë me një afat të shkurtër(punëtorë sezonal), ndërkohë, ata që kanë leje qendrim më afat më të gjatë, vazhdon të mbetet në fuqi e njejta procedurë si ka qenë më parë, procedura e konvertimit nga patenta e Kosovës në atë të Austrisë.

Sidoqoftë, albinfo.at për detaje tjera, do ju mbaj të informuar edhe gjatë ditëve të ardhshme.