Zvicra synon t’i bashkohet European Sky Sheild

Departamenti Federal i Mbrojtjes ka njoftuar se Zvicra synon t’i bashkohet sistemit evropian të mbrojtjes ajrore Sky Shield, shkruan RTS.

Ministri gjerman i Mbrojtjes Boris Pistorius dhe homologja e tij austriake Klaudia Tanner do të jenë në Bernë të premten.

Austria neutrale do të nënshkruajë gjithashtu dokumentin në takimin e së premtes, i cili po mbahet në kuadër të takimeve të rregullta trepalëshe të DACH midis Zvicrës, Gjermanisë dhe Austrisë, përcjell albinfo.ch.

Pas nënshkrimit të deklaratës së synimit, Zvicra do të jetë në gjendje të vlerësojë se në cilat fusha duhet të forcohet bashkëpunimi, për shembull në lidhje me shkëmbimin e informacionit.

Kancelari austriak Karl Nehammer kishte njoftuar të shtunën se Austria po konsideronte t’i bashkohej projektit gjerman për të ngritur një sistem më të mirë evropian të mbrojtjes ajrore.

Nisma “European Sky Shield” u prezantua nga Gjermania në gusht 2022 dhe aktualisht përfshin 17 vende, duke përfshirë anëtarët e NATO-s: Britania e Madhe, Sllovakia, Letonia, Hungaria, Bullgaria, Belgjika, Republika Çeke, Finlanda, Lituania, Holanda, Rumania, Sllovenia, Estonia dhe Norvegjia. Në shkurt, Suedia, një vend kandidat për anëtarësim në NATO, dhe Danimarka gjithashtu iu bashkuan projektit, përcjell albinfo.ch.