Kosova

Kryeministri i Kosovës komenton marrëdhëniet me homologun e tij shqiptar

E shtunë, 12 Gusht 2023 - 21:00 albinfo.ch

FB: Albin Kurti

Kryeminsitri i Kosovës, Albin Kurti, gjatë ditës së sotme ka zhvilluar një vizitë në Maqedoninë e Veriut, ku ka komentuar edhe marrëdhëniet me kryeministrin e Shqipërisë, Edi Rama.

Kurti është shprehur se me kryeministrin Rama ka marrëdhënie korrekte dhe raporte të mira, por sipas tij, kjo nuk do të thotë që nuk mund të kritikohen, pasi kritikat janë pjesë e demokracisë.

Ndër të tjera ai foli edhe për anulimin e mbledhjes së 14 qershorit, për të cilën tha se është për të ardhur keq që nuk u bë, por kjo nuk ishte zgjedhja e Kosovës.

“Ne kemi raporte korrekte, kemi raporte të mira, është çështje e përgjegjësive. Kjo nuk do të thotë që nuk kritikohemi, kritikat janë pjesë e demokracisë. Është për të ardhur keq që më 14 qershor nuk u mbajt mbledhja e dy qeverive shqiptare, por anulimin e saj nuk e kemi bërë ne”, tha ai.