Edhe gjashtë minatorëve të “Trepçës” u keqësohet gjendja gjatë grevës

Gjatë ditës së sotme gjashtë minatorë të “Trepçës” janë dërguar në Emergjencë për shkak të gjendjes shëndetësore të rënduar, në ditën e gjashtë të grevës.

Mjeku Ridvan Ramaxhiku ka njoftuar se vetëm gjatë ditës së sotme 18 minatorë kanë pranuar tretman, dy prej të cilëve janë dërguar në Emergjencë, ndërsa të tjerët për kokëdhimbje.

Ndërkaq, gjatë ditës së djeshme 21 minatorë kanë marrë trajtim mjekësor për shkak të keqësimit të gjendjes shëndetësore.

Në anën tjetër, Punëtorët e Bashkuar të Minierave të Amerikës i kanë shkruar letër kryeministrit të Kosovës, Albin Kurti, për grevën e minatorëve të Trepçës, përmes së cilës kërkuan zgjidhje sa më të shpejtë, përcjell albinfo.ch.

“Për 133 vitet e fundit ne kemi mbrojtur të drejtat e minatorëve në Shtetet e Bashkuara dhe Kanada dhe kemi qëndruar gjithmonë në solidaritet me vëllezërit dhe sindikatat simotrat tona anembanë globit. Me krenari përkrahim 710 vëllezërit dhe motrat tona kosovare të Minatorëve të Sindikatës së Pavarur të TREPÇËS, të cilët janë në grevë urie në TREPÇË KOSOVË që nga 24 tetori 2023”, thuhet në letër.