Përurohen dy tunele dhe rihapet linja hekurudhore që lidh Prishtinën me Shkupin

Gjatë ditës së sotme janë përuruar dy tunele dhe është rihapur linja hekurudhore Hani i Elezit – Fushë Kosovë. Tunelet, të cilët ishin të shembur, janë të gjata njëri 262 metra dhe tjetri 122.

Kryeministri i Kosovës, Albin Kurti, e ka cilësuar ngjarjen si ndër më të rëndësishmet, teksa ka thënë se vlera e punimeve në këtë segment, nga kufiri i Maqedonisë së Veriut deri në Fushë-Kosovë, është mbi 164 milionë euro.

Kurti ka shprehur mirënjohje për Bashkimin Evropian, Bankën Evropiane për Investim dhe Bankën Evropiane për Rindërtim dhe Zhvillim, për mbështetjen e financimit dhe rehabilitimit të kësaj linje hekurudhore, e cila, siç tha ai, do t’i sjellë qytetarët e Kosovës edhe më pranë Bashkimit Evropian.

“Me Linjën 10 edhe me hekurudhën Prishtinë-Durrës, po e bëjmë Kosovën pjesë të Rrjetit të Transportit Trans-Evropian. Lidhjet infrastrukturore po i forcojmë, zgjerojmë dhe modernizojmë. Me forcim, rriten shkëmbimet. Me zgjerim, rritet ndërlidhja, ndërkaq me modernizim, rritet shpejtësia”, ka shkruar ai në “Facebook”, përcjell albinfo.ch.

Kurti ndër të tjera u shpreh se hekurudha është një infrastrukturë shumë e rëndësishme që lidh Kosovën me rajonin dhe me Evropën.