Cyrihu ndez dritat e Krishtlindjes, festa mund të fillojë!

Janë 11.550 kristale të ndriçuara që, së bashku, përbëjnë kompleksin e madh të ndriçimit për Krishtlindje të rrugës më të njohur të Cyrihut (dhe të Zvicrës) Bahnhofstrasse. Ndezja simbolike e këtyre kandelave është bërë sonte, në orën 18.00. Koha pas kësaj, llogaritet si kohë parafestive, kur hapen shumica e tregjeve karakteristike të Krishtlindjes dhe fillon ajo, që më shumë se devotshmëri fetare,  reflekton një dalldi festive.

Muaji para Krishtlindjes është në fakt një festë e zgjatur popullore, ku mbizotëron logjika e konsumit (dhuratat e shumta) dhe ku thjesht, celebrohet kënaqësia jetësore, një festë që ka si qëllim të “mbysë” zymtinë e kësaj mezokohe, mes vjeshtës së ngjyrave të bukura dhe dimrit të skive.

Krahas ndezjes së dritave në rrugën e përmendur, në hollin e madh të Stacionit kryesor të trenave (më të madhit në Zvicër) ka filluar gjallëria në tregun e posahapur të Krishtlindjes. Ushqime, pije, stoli, suvenire e çfarë jo tjetër, mund të gjejë njeriu në stendat dhe kioskat e improvizuar në këtë treg. Dhe, një gotë vere e vluar (e zier) nuk bën të mungojë assesi në shetinë që bën secili nëpër këtë treg simpatik.

(Fotot: albinfo.ch)