AAK e NISMA bashkojnë forcat politike, nënshkruajnë koalicion parazgjedhor

Aleanca për Ardhmërinë e Kosovës e udhëhequr nga Ramush Haradinaj e Nisma Socialdemokrate e Fatmir Limajt kanë mbledhur sot forcat bashkë duke nënshkruar një koalicion parazgjedhor.

“Ne bashkë në diskutimet disa mujore, kemi vlerësuar se qytetari i Kosovës ka mbetur i vetëm dhe në raste të caktuara edhe i luftuar nga Qeveria e Kosovës dhe Kurti”, ka deklaruar Ramush Haradinaj pas nënshkrimit.

Ndërsa Limaj tha se vendi më shumë se kurrë ka nevojë për bashkimin e energjive pozitive, bashkim në diversitet, bashkim në iniciativa, përcjell albinfo.ch.

“Vijmë bashkë me kryetarin Haradinaj me një projekt të ri, të përbashkët, i cili veç ka nisur e është i hapur dhe i ftojmë të gjithë ata njerëz që mendojnë se Kosova më shumë se kurrë ka nevojë t’i bashkojë energjitë, tash është koha për t’i dhënë një dinamikë të re vendit”, u shpreh Limaj.

Kjo nuk është marrëveshja e parë mes këtyre dy subjekteve pasi të njejtat ishin në koalicion bashkë në vitin 2017-2019 dhe në bashkëqeverisje vite më parë.