Lara Gut Behrami: Nuk kam gjak shqiptari por krenare që në familje bashkëshortin e fëmijët i kam shqiptarë

Ndonëse nuk ka gjak shqiptari, Lara Gut Behrami thotë të ndjehet krenare që në familjen e saj fëmijët e bashkëshorti janë shqiptarë

Një jetë mes maleve. Lara Gut Behrami është emër i njohur saherë që flitet për sportin e skijimit. Edhe më e njohur është bërë ndër shqiptarët për faktin se është e martuar me futbollistin e njohur nga Kosova, Valon Behrami.

Ndonëse nuk ka gjak shqiptari, Lara Gut Behrami thotë të ndjehet krenare që në familjen e saj fëmijët e bashkëshorti janë shqiptarë, transmeton albinfo.ch.

“Jam krenare që mbaj mbiemrin Behrami. Jam krenare që kam një familje kaq të mirë si  kjo e imja, bashkë me Valonin. Sigurisht unë nuk kam gjak shqiptar por fëmijët tanë padyshim”, thotë ajo në një intervistë për Top Channel.

E vetëdijshme që ndiqet nga shumë shqiptarë, Lara Gut Behrami thotë se ka arritur që nëpërmjet sportit të depërtojë në Shqipëri e Kosovë, ndonëse ende nuk ka qenë në këto vende, përcjell albinfo.ch.

“E di që ka shumë shqiptarë që më ndjekin. Vjehrri im ka vëllezërit në Kosovë, Valoni ka kushërinj të tjerë që jetojnë në Prishtinë. Nëpërmjet tyre pak nga sporti i skive sigurisht kur është Olimpiada kam mbërritur në Shqipëri dhe Kosovë”, shprehet ajo.

Por tregon planet që ka për të vizituar dy shtetet shqiptare.

“Nuk kam qenë asnjëherë, por besoj shumë shpejtë”, thotë skiatorja Lara Gut Behrami.

---