Lajme

Zvicër: Dy javë pushim i atësisë edhe për fëmijën e vdekur

Këtë e vendosi edhe Dhoma e Kantoneve (senati) pas Dhomës Nacionale, e cila e kishte pranuar më parë një propozim përkatës

E martë, 5 Mars 2024 - 15:20 albinfo.ch

Foto ilustrim (Keystone)

Duke qenë se në Zvicër njihet tashmë pushimi i atësisë me rastin e lindjes së fëmijëve, ky pushim, pra leja për të mos punuar dy javë, duhet të jepet gjithashtu edhe nëse fëmija ka lindur i vdekur ose vdes në lindje.

Këtë e vendosi edhe Dhoma e Kantoneve (senati) pas Dhomës Nacionale, e cila e kishte pranuar më parë një propozim përkatës, transmeton albinfo.ch. Megjithatë, teksti ka pësuar një ndryshim nga Dhoma e Kantoneve. Në versionin e saj, leja duhet të jepet edhe nëse fëmija vdes brenda 14 ditëve nga lindja e tij.

Prandaj, leja duhet të jepet përnjëherë (dy javë, pa ndërprerje) që nga momenti i lindjes së vdekur të foshnjës ose vdekjes së mëvonshme, shkruan srf.ch. Për shkak të kësaj përshtatjeje, çështja tani duhet të kthehet edhe njëherë për shqyrtim dhe votim në Dhomën Nacionale (Këshilli Kombëtar).