Pse është shqetësuese ngrohja e ujërave të liqenit të Gjenevës?

Liqeni i Gjeneves, Pixabay

Temperaturat e larta rekord të matura në liqenin e Gjenevës të Zvicrës kanë ngjallur shqetësime për të ardhmen e tij.

Për vite me radhë, liqeni, i njohur në vend si Lac Léman dhe i ndarë midis Zvicrës dhe Francës, ka rënë viktimë e ngrohjes globale, pothuajse në të njëjtën mënyrë si shkrirja e akullnajave, transmeton albinfo.ch.

Uji i liqenit kishte arritur një temperaturë rekord prej 13.6 gradë Celsius në vitin 2022 – shumë e lartë për çdo liqen – sipas një raporti të fundit nga Komisioni Ndërkombëtar për Mbrojtjen e Ujërave të Liqenit të Gjenevës (CIPEL).

Ndërsa ky mund të jetë një lajm i mirë për notarët, një ndryshim i tillë drastik i temperaturës po dëmton ekosistemin delikat natyror të liqenit, shkruan thelocal.

Kjo për shkak se uji i ngrohtë sipër dhe uji më i freskët i bllokuar poshtë krijon më pak oksigjen, i cili, nga ana tjetër, mund të vrasë peshqit dhe organizmat e tjerë detarë që nuk mund të marrin më frymë nën sipërfaqe.

Organizata CIPEL, ka deklaruar se në funksion të këtij përkeqësimi alarmant, është e angazhuar për të forcuar “zbatimin e masave efektive të ruajtjes për Liqenin e Gjenevës”.

“Veprimi është i nevojshëm sepse në një kontekst të ndryshimeve klimatike, Liqeni i Gjenevës është një burim strategjik i paçmuar dhe është thelbësor për të garantuar cilësinë e tij të mirë”, thuhet në njoftim.

Sipas kësaj organizate, gjetjet e raportit janë të rëndësishme, sepse ato “sigurojnë një bazë thelbësore për politikëbërësit, shkencëtarët dhe komunitetin lokal në mbrojtjen e ekosistemit tonë të çmuar të liqenit”.