Ka kryer disa delikte, kapet kosovari në kufirin Gjermani – Austri

Kur të dhënat e tij personale u kontrolluan në listën e të kërkuarve, rezultoi se personi ishte shpallur jo më pak se katër herë në atë listë

Një kosovar i kërkuar disa herë për delikte të ndryshme ka rënë në duart e policisë kufitare Piding, Gjermani. Ai, përveç që qëndronte në Gjermani në mënyrë të paligjshme, kishte në dosjen e tij edhe një sërë shkeljesh të tjera.

Vizita familjare e kosovarit 38-vjeçar mori fund të menjëhershëm kur ai ra në duart e një patrulle të policisë kufitare Piding në A8 pranë Teisenberg mbrëmjen e së mërkurës, transmeton albinfo.ch. Ai po udhëtonte me një autobus në distanca të gjata, të cilin e kontrolluan policët, thuhet në një njoftim për shtyp nga policia kufitare e Piding.

Kur të dhënat e tij personale u kontrolluan në listën e të kërkuarve, rezultoi se personi ishte shpallur në listën e të kërkuarve jo më pak se katër herë, vijon njoftimi i policisë, shkruan pnp.de. Ai po ashtu qëndronte ilegalisht në Gjermani, sepse tashmë e kishte tejkaluar ndjeshëm kohëzgjatjen maksimale të qëndrimit në zonën Shengen.

Në momentin e kontrollit, ai ishte duke u kthyer nga Rheinland-i për në Kroaci. Kosovari, i cili aktualisht po kërkonte punë, ka dy vjet që nuk ka vendbanim të përhershëm në Gjermani, por për shkak të delikteve të kryera në atë kohë  ai është kapur nga policia kufitare në Piding.

Krahas vjedhjeve të shumta, ai është përfshirë vazhdimisht edhe në mashtrime.

Mjeshtri i kualifikuar për shtrim pllakash ofronte punë rinovimi. Për këtë shërbim ai kërkonte paradhënie nga porositësit e punës së tij. Por ai, edhe pse merrte të hollat nuk e kryente punën, përcjell albinfo.ch. Sipas policisë, ai u ka shkaktuar klientëve të tij dëme të konsiderueshme pesëshifrore (mbi 10 mijë euro).

Ai gjithashtu ka vozitur shpesh në të kaluarën, edhe pse, sipas policisë, ai nuk kishte patentë shofer. Kjo i ka sjellë një gjobë prej më shumë se 7 mijë eurosh, të cilën, sipas një komunikate për media, nuk e ka paguar asnjëherë dhe për këtë arsye ndaj tij është lëshuar fletarrest .

Kosovari është sjellë para gjykatësit hetues dhe është dërguar në institucionin korrektues.

---