Dordoleci “Böög” parasheh një verë të freskët

Në Cyrih për çdo vit në prill mbahet festa tradicionale me elemente pagane “Sechseläute” që shënon edhe fillimin e stinës së ngrohtë. Në qendër të kësaj feste popullore është “Böög” një lloj dordoleci i bërë nga tekstili me dinamit brenda, i cili vendoset në majë të një shtylle dhe i vihet zjarri. Në varësi të kohës që i nevojitet deri te eksplodimi i “Böog”-ut, sipas besëtytnive popullore do të mbajë stina e verës. Kur eksplodimi zvarritet më gjatë atëherë do të kemi verë më të freskët. Pikërisht kështu ka ndodhur sot.
Plot 20 minuta e 39 sekonda është dashur të kalojnë deri në shpërthimin e dordolecit gjë që është tregues për një verë të freskë që na pret.

Ndryshe, festa “Sechseläute” zgjat dy ditë dhe për nder të saj bëhen dy parakalime të mëdha: njëri, i fëmijëve, ku ata parakalojnë me veshje të ndryshme kombëtare e regjionale dhe tjetri, parakalimi i të rriturve sipas profesioneve ose “Zunft”-eve (ngjashëm me “esnafet”). Në parakalimin e parë marrin pjesë rregullisht edhe fëmijët shqiptarë me veshjet e tyre të bukura e të larmishme kombëtare. Prej më shumë se 10 vitesh shqiptarët përfaqësohen nga Shkolla Shqiptare e Vallëzimit “Shota”.

Festa secilin vit ka mysafir nga një kanton ndërsa këtë vit për herë të parë “mysafir” i qytetit të Cyrihut ka qenë Kantoni i Cyrihut.