Shtetasit nga Shqipëria dhe Kosova kryesojnë listën e kërkesave për azil

Mbi 6 mijë shtetas të Kosovës aplikuan për azil në Evropë gjatë vitit 2024

Agjencia Evropiane e Azilit, në raportin e saj vjetor të sapo publikuar, bën të ditur se gjatë vitit 2024, 7,325 shtetas shqiptarë kanë paraqitur kërkesë për azil në një vend të Bashkimit Evropian, përcjell albinfo.ch.

Shtetasit nga Shqipëria dhe Kosova kryesojnë dukshëm listën e kërkesave për azil nga vendet e tjera të Ballkanit Perëndimor.

Sipas të dhënave të Agjencisë Evropiane për Azilin, 6,791 shtetas nga Kosova kanë kërkuar azil në Evropë, ndërsa nga Maqedonia e Veriut janë paraqitur 3,506 kërkesa. Nga Serbia u regjistruan 3,227 kërkesa, nga Bosnja dhe Hercegovina 1,432, dhe nga Mali i Zi 337 kërkesa.

Numri i kërkesave për azil të shtetasve shqiptarë në vendet europiane shënoi rënie krahasur me vitin 2023 ku sipas të dhënave kanë qenë 9,145 shtetas shqiptarë që kanë aplikuar për azil në një nga shtetet e Bashkimit Europian.

Franca vijon të jetë vendi më i pëlqyer për banorët e Shqipërisë për të kërkuar azil dhe më pas renditet Gjermania pasuar nga dy vendet fqinje Italia dhe Greqia.

Raporti i Agjencisë europiane për Azilin thotë se në vitin 2024 vendet e Bashkimit Europian morën rreth një milion kërkesa për azil për të tretin vit radhazi.

Ndërkohë, sipas të dhënave, në fund të vitit 2024 kishte rreth 4.4 milionë përfitues të mbrojtjes së përkohshme në vendet e Bashkimit Evropian, të cilët kishin ikur nga Ukraina. Gjysma e tyre u pritën në Gjermani dhe Poloni, ndërsa Çekia priti më shumë përfitues në raport me numrin e popullsisë, raporton VOA.

Të dhënat e raportit tregojnë një rënie të lehtë të kërkesave për azil krahasuar me vitin 2023. Sirianët mbetën grupi më i zakonshëm që kërkonte mbrojtje në vendet e Bashkimit Evropian, megjithëse gjatë vitit 2024 ata paraqitën më pak aplikime sesa në vitin 2023, pas rënies së regjimit të Asadit.

---