Baleti i Kosovës jep shfaqje në teatrin e Grazit

Më 30 maj, ditën e shtunë, në orën 19:30, trupa e Baletit të Kosovës do të prezantohet me shfaqjen “Your stories, my story”, në Graz të Austrisë.

Shfaqja e baletit “”Your stories, My story”  është menduar si një performancë e përgatitur enkas për Baletin e Kosovës, të bazuar në intervista dhe shkëmbime mes koreografit Darrel Toulon dhe 20 valltarëve të baletit.

“Your stories, my story” është balet modern, i bazuar në vuajtjet e popullit të Kosovës dhe balerinëve në veçanti gjatë luftës së fundit. Kjo përveç që kërkon përkushtim të madh fizik, edhe aspekti emocional luan një rol të rëndësishëm, pasi secili prej tyre ka qenë pjesë e asaj ngjarjeje.

“Ky është një rast i shkëlqyeshëm për Baletin Kombëtar për të pasuruar më tej profilin kulturor ndërkombëtar të Kosovës para një publiku kulturor dhe artistik që kërkon shumë dhe për të krijuar mundësi të reja për veprime rajonale dhe ndërkombëtare të krijimit të rrjeteve dhe të bashkëpunimit”, thuhet në një njoftim për media nga Baleti i Kosovës, njofton albinfo.ch.

Sipas këtij njoftimi, “Your stories, My story” u dha për herë të parë në Prishtinë në tetor 2014 dhe pati një sukses të madh dhe një pritje të ngrohtë nga publiku i Kosovës.

Për këtë shfaqje trupa ka bashkëpunuar me koreografin austriak, Darrel Toulon.

Shfaqja është një projekt i përbashkët i Baletit Kombëtar të Kosovës, të mbështetur nga projekti “Culture for All” dhe i Ambasadës Austriake në Kosovë.

Më 30 maj, Baleti i Kosovës do të ketë rastin të paraqesë këtë shfaqje para publikut austriak në Teatrin e Grazit falë mbështetjes zemërgjerë të Ambasadës së Austrisë në Kosovë dhe kontributit të madh të Darrel Toulonin, drejtor i Baletit të Grazit, thuhet në njoftim.