Riola Xhemaili firmos me PSV-në deri në vitin 2028

KEYSTONE/Laurent Gillieron)

PSV Eindhoven ka bërë zyrtare transferimin e futbollistes së talentuar me origjinë shqiptare Riola Xhemaili, e cila ka nënshkruar kontratë deri në vitin 2028 me klubin holandez. 22-vjeçarja, që sezonin e kaluar ishte pjesë e PSV-së si e huazuar nga Wolfsburgu, ka bindur drejtuesit me paraqitjet e saj mbresëlënëse, transmeton albinfo.ch.

Në edicionin e fundit, Xhemaili luajti si titullare në të gjitha 26 ndeshjet e sezonit, duke realizuar 14 gola dhe duke asistuar në gjashtë raste, një kontribut vendimtar në fitimin e Kupës nga skuadra e Eindhovenit.

“PSV-ja u bë shpejt si shtëpi për mua. Kjo për shkak të njerëzve brenda klubit, ambienteve, por edhe për shkak të qytetit dhe vendit. Pas disa muajsh e kuptova se dua të luaj përsëri këtu vitin tjetër. Kështu që nuk do të jetë surprizë për shoqet e mia të ekipit që tani do të qëndroj përgjithmonë. Jam jashtëzakonisht e lumtur për këtë”, deklaroi Xhemaili për faqen zyrtare të klubit.

E entuziazmuar për të ardhmen, ajo shtoi: “Sezoni i kaluar ishte plot emocione. Ne luajtëm fort dhe fituam Kupën. Kemi cilësi dhe jemi të uritura për më shumë. Ne synojmë të fitojmë titullin dhe të paraqitemi në Ligën e Kampionëve për futbolliste.”

Xhemaili, që vlerësohet si një nga talentet më premtuese të futbollit zviceran, është përfshirë në listën zyrtare të kombëtares së Zvicrës për Kampionatin Evropian të futbollisteve, që do të mbahet nga 2 deri më 27 korrik, me Zvicrën si nikoqire.

Aventura e saj në futbollin profesionist ka nisur që në moshën 15-vjeçare me skuadrën e parë të Baselit, ndërsa dy vite më vonë bëri debutimin me ekipin A të Zvicrës. Pas një periudhe të suksesshme me Baselin, ajo u transferua te Freiburgu dhe më pas te Wolfsburgu, me të cilin në vitin 2023 luajti në finalen e Ligës së Kampionëve, transmeton albinfo.ch.