Astrit Alihajdaraj, të martën në serialin e njohur austriak

Seriali "Soko Kitzbühel" ku luan aktori Alihajdaraj do të transmetohet në televizionin “Orf1” nga ora 21:05 minuta

Aktori kosovar Astrit Alihajdaraj vazhdon me shfaqje të reja në teatrin dhe kinematografinë austriake. Djaloshi nga Istogu cili prej vitesh jeton në Vjenë të Austrisë, do të shfaqet në serialin e njohur austriak “Soko Kitzbuhel”, përkatësisht në episoden e fundit për këtë sezon, i cili quhet “Erlösung”.

Seriali i cili shfaqet për shumë vite transmetohet të martën në televizionin kombëtar austriak “Orf 1”, duke filluar nga ora 21:05 minuta, ndërsa ritransmetimi jepet të mërkurën në mëngjes në orën 2:30 dhe paradite në orën 10: 40 minuta, raporton “albinfo.ch”.

Seriali është film aksion, ndërsa aktori ynë do të luajë rolin e një biznesmeni që bën tregti me hotele por që në këtë episod akuzohet edhe për tregti tjera jo legale.

“Ishte një rol i ri për mua, sigurisht interesant dhe një përvojë e re me kolegë shumë të mirë dhe profesionistë. Pra, ishte një përvojë shumë e mirë që pasuron repertorin e roleve të mia të deritashme”, thotë djaloshi nga Istogu për “albinfo.ch”.

Astrit Alihajdaraj është aktori shqiptar më i suksesshëm i gjeneratës së re në Austri.