“Disiplinohet” Suisephone

Ajo duhet që në çdo prezantim telefonik të tregojë qartë identitetin e saj, që të mos krijohen ngatërrime me swisscom-in

©keystone

Në bazë të një vendimi që ka marrë Gjykata Ekonomike e Kantonit të Cyrihut, kompania Suissephone Communications në të ardhmen detyrohet të respektojë vënien e shenjës së yllit në librat telefonikë. Ajo po ashtu duhet që në çdo prezantim telefonik të tregojë qartë identitetin e saj, që të mos krijohen ngatërrime me swisscom-in.

Kompaninë Suisephone Communications para gjykatës në fjalë e ka paditur Sekretariati Shtetëror për Ekonomi (Seco) në nëntor të vitit të kaluar.

Seco-s i kishin ardhur numër i madh ankesash nga konsumatorët sipas të cilave, këta të fundit, përkundër shenjës së yllit në librin telefonik, kishin marrë telefonata me përmbajtje marketingu nga Suissephone Communications. Shumë nga konsumatorët kanë pohuar se Suissephone ka shkaktuar një rrezik të qëllimshëm të ngatërrimit me Swisscom. Ata kanë abonuar telefoninë fikse te Suissephone ndërkaq kanë vazhduar të paguajnë taksën prej 25.35 frangash në muaj te Swisscomi.

Pasi që vërejtja e parë nuk kishte treguar rezultat, Seco kishte ushtruar padi civile kundër Suissephone në Gjykatën Ekonomike të Kantonit të Cyrihut. Me vendimin e kësaj të fundit Suissephone merr detyrime të ndryshme. Veç tjerash, ajo detyrohet që në prezantimet e saj telefonike para konsumatorëve të tregojë emërtimin e plotë “Suissephone Communications”.

Po ashtu në të ardhmen firma në fjalë do të respektojë dëshirën e konsumatorëve që kanë shprehur për të mos marrë më telefonata marketingu.