Vazhdohet deri më 2019 puna e qendrës testuese të azilit

Në këto qendra, procedurat do të zhvillohen nga fillimi deri në fund, gjegjësisht deri në vendimin përfundimtar e të plotfuqishëm për ose kundër dhënies së azilit

Keystone

Qeveria e Zvicrës do ta vazhdojë më tutje punën testuese të qendrës së azilit që ka filluar të funksionojë si projekt testues me procedurë të shkurtuar. Për ta bëre ketë, është vendosur që puna e kësaj qendre të zgjatet deri më 28 shtator 2019.

Nga janari i vitit 2014 Sekretariati Federal për Migracion (SEM) ka filluar në Cyrih punën me një qendër procedurale ku testohet procedura e re, e shkurtuar e azilit. Kjo qendër është menduar si baza e ristrukturimit në fushë të azilit, , qëllimi kryesor i të cilit është që shumica e procedurave të zhvillohen në njërën nga qendrat regjionale të federatës.

Në këto qendra, procedurat do të zhvillohen nga fillimi deri në fund, gjegjësisht deri në vendimin përfundimtar e të plotfuqishëm për ose kundër dhënies së azilit. Kjo nënkupton procedurë më të shpejtë por edhe më korrekte se deri më tash.

Mbështetur në vendimin e marrë nga Parlamenti më 26 shtator 2014 mbi vazhdimin e masave emergjente në fushë të azilit, Këshilli Federal tash ka vendosur që ta zgjasë fazën testuese deri më 28 shtator 2019, thuhet në një komunikatë të SEM.

Funksionimi testues i qendrës vlerësohet nga katër organizata të jashtme. Në një raport të bërë në shkurt 2015 lidhur me ecurinë e deriatëhershme është konstatuar se projekti testues ka ndikuar në shkurtimin e ndjeshëm të procedurave të azilit. Është fjala për një shkurtim mesatar prej 30 për qind në krahasim me procedurën e rregullt, pa pësuar dëme në cilësinë e marrjes së vendimeve.

Në fillim të vitit 2016 do të publikohet një raport përfundimtar për fazë e deritashme testuese.