Arrestohet në Zvicër ish-gjenerali boshnjak

Policia zvicerane ka arrestuar të mërkurën në Thônex të kantonit të Gjenevës ish-gjeneralin boshnjak, Naser Oriç, me një urdhër arresti të lëshuar nga Interpoli.

Oriç u arrestua në kufirin mes Zvicrës dhe Francës, ka bërë të ditur policia kantonale e Gjenevës.

Ai ishte arrestuar për akuzat që ishin ngritur nga Prokuroria në Beograd vitin e kaluar, në bazë të dokumenteve gjyqësore të Tribunalit të Hagës.

Oriç dyshohet të këtë kryer krime lufte kundër civilëve serbë të Bosnjës më 1992 në fshatin Potocari, pranë Srebrenicës. Krimet, për të cilat akuzohen, përfshijnë vrasje dhe plaçkitje.

Krimet e pretenduara ndodhën përpara sulmit të vitit 1995 nga ushtria serbe e Bosnjës në Srebrenicë, ku më shumë se 7000 burra dhe djem u vranë, një krim që më vonë u cilësua si gjenocid nga gjykatat ndërkombëtare dhe vendëse.

Oriç u lirua për krime lufte kundër serbëve në Srebrenicë nga Gjykata e Hagës më 2008, ku gjykata urdhëroi se ai nuk kishte kontroll mbi krimet e kryera nga ushtria boshnjake.

Vendimi kishte zemëruar Beogradin dhe Këshilli nacional serb kishte thënë në atë kohë se vendimi nuk kontribuonte në arritjen e drejtësisë dhe të vërtetës apo pajtimit rajonal.

Ekstradimi do të jetë i pasigurt, sepse kjo do të varet nga vendimi i autoriteteve gjyqësore zvicerane.