Migros feston 100-vjetorin me 1.3 milion trëndafila për klientët

Një shekull Migros: Lule falas në të gjitha dyqanet më 16 gusht

Të shtunën, më 16 gusht, rrjeti më i madh i shitjes me pakicë në Zvicër, Migros, do të shpërndajë 1.3 milion trëndafila në të gjitha dyqanet e saj në mbarë vendin, si një gjest falënderimi për klientët dhe për të shënuar një moment historik,  100-vjetorin e themelimit të kompanisë, përcjell albinfo.ch.

Kjo fushatë simbolike nuk është thjesht një mënyrë për të festuar, por edhe një homazh për “Nägeli-Aktion”, një iniciativë e ngjashme e ndërmarrë nga Migros në vitin 1947, kur kompania shpërndau lule për të përmirësuar moralin dhe ndjenjat pozitive të konsumatorëve pas Luftës së Dytë Botërore.

“Kjo është mënyra jonë për të falënderuar klientët tanë për besimin dhe mbështetjen e tyre gjatë gjithë këtyre viteve,”  thuhet në një deklaratë të Migros.

Çdo vizitor i një dyqani Migros të shtunën do të ketë mundësinë të marrë një trëndafil falas, si një shenjë mirënjohjeje dhe festimi.

Migros, e themeluar më 15 gusht 1925, ka luajtur një rol të rëndësishëm në historinë ekonomike dhe sociale të Zvicrës, duke u bërë pjesë e përditshme e jetës së miliona njerëzve.

---