Lavrov: Rusia shpreson të vazhdojë diskutimet e dobishme gjatë samitit në Alaskë

Kryediplomati rus, Sergei Lavrov, ka thënë të premten se vizita e të dërguarit të posaçëm amerikan, Steve Witkoff, në Moskë javën e kaluar, ka qenë vendimtare dhe se është arritur shumë gjatë takimit të tij me presidentin rus, Vladimir Putin.

Ai ka deklaruar më tutje se pala ruse shpreson që të vazhdojë “diskutimet e dobishme” edhe gjatë samitit mes Shteteve të Bashkuara të Amerikës dhe Rusisë në Alaskë të premten (sot), ka shkruar Reuters.

Në këtë samit historik, presidenti amerikan, Donald Trump, do të takohet me homologun rus, Vladimir Putin, për të diskutuar rreth mbarimit të luftës në Ukrainë. 

Takimi do të mbahet pa prezencën e presidentit ukrainas, Volodymyr Zelensky, dhe liderëve të tjerë evropianë, ndonëse Trumpi ka theksuar disa ditë më parë se një takim i dytë, ku do të përfshihen Putini dhe Zelensky është i mundur.

Presidenti amerikan kishte kërcënuar po ashtu Rusinë se do të ballafaqohet me “pasoja shumë të rënda”, në rast se Putini nuk e pranon marrëveshjen e paqes në Ukrainë, pas samitit mes tyre.

E shefi i Kremlinit, nga ana tjetër, i ka falënderuar Shtetet e Bashkuara të Amerikës sa u përket “përpjekjeve të tyre të sinqerta” për t’i dhënë fund luftës që tashmë ka hyrë në vitin e saj të katërt.

“Administrata aktuale amerikane… po bën, sipas mendimit tim, përpjekje mjaft të sinqerta për të ndaluar armiqësitë, për të ndaluar krizën dhe për të arritur marrëveshje që janë me interes për të gjitha palët e përfshira në këtë konflikt”, ka thënë Putin.

Samiti do të fillojë në orën 11:30 (sipas kohës lokale në Alaska) dhe kohëzgjatja e bisedimeve do të varet nga agjenda e planifikuar.

Të dy burrështetasit pritet gjithashtu që të japin një konferencë të përbashkët për shtyp në fund të samitit.

Delegacioni rus do të përfshijë Lavrovin, ministrin e Mbrojtjes Andrey Belousov, ministrin e Financave Anton Siluanov, kreun e fondit sovran rus, Kirill Dmitriev dhe ish-ambasadorin e Rusisë në SHBA, Yuri Ushakov.