Kosovë: Quint-i dhe BE-ja të shqetësuar për kufizimin e garës së partive në zgjedhje lokale

Ambasadat e Francës, Gjermanisë, Italisë, Mbretërisë së Bashkuar dhe Shteteve të Bashkuara, së bashku me Zyrën e BE-së në Kosovë, kanë shprehur shqetësimin e tyre lidhur me përpjekjet e disa aktorëve politikë për të kufizuar garën ndërmjet partive që përfaqësojnë komunitetet jo-shumicë, para zgjedhjeve lokale të 12 tetorit.

Në deklaratën e përbashkët thuhet se çdo veprim për të përjashtuar komunitete të caktuara cenon parimet demokratike dhe minon besimin në institucionet e Kosovës.

“Presim që qeveria në detyrë dhe të gjitha partitë politike të përmbahen nga hapa të mëtejshëm që mund të pengojnë regjistrimin e partive. Të gjitha procedurat duhet të zhvillohen rreptësisht në përputhje me rregullat dhe mandatin e Komisionit Qendror të Zgjedhjeve”, thuhet në komunikatë, transmeton albinfo.ch.

Quint-i dhe BE-ja gjithashtu i kanë inkurajuar partitë e prekura që të shfrytëzojnë të gjitha mundësitë ligjore përmes Panelit Zgjedhor për Ankesa dhe Parashtresa për të kërkuar zgjidhje.