Nuk do të taksohen trashëgimitë milionëshe në Zvicër

Nuk do të përfshihet në tatim në të ardhmen pasuria e trashëguar në Zvicër.

Zviceranët kanë refuzuar të dielën iniciativën e e socialdemokratëve dhe sindikatave që kërkonin që të gjithë ata që trashëgojnë së paku 2 milionë franga  t‘i paguajnë tatim shtetit.

Rreth 71.7 për qind e votuesve në të gjitha kantonet kanë hedhur poshtë iniciativën për një taksë nacionale për pasurinë e trashëguar.

Asnjëherë deri më tash në Zvicër nuk është trashëguar pasuri më shumë se viteve të fundit. Kështu, sipas një studimi të realizuar nga Universiteti i Lozanës dhe ai i Cyrihut, vlera e pasurisë së trashëguar në vitin 2011 në nivel të Zvicrës ka qenë 61 miliardë franga.

Ndërsa një përllogaritje e bërë për vitin 2015 flet madje për 76 miliardë franga.

Nga ana tjetër, Këshilli Federal dhe Komiteti për mbështetjen e iniciativës “Të taksohen trashëgimitë milionëshe” deri tash kanë menduar se bëhet fjalë për vetëm 40 miliardë franga.

Me shifrat e reja, edhe fitimet nëse do të kalonte iniciativa do të ishin dukshëm më të mëdha. Kështu, veç tjerash propozohet që me këtë fitim të shtuar të përforcohet financimi i sigurimit pensional dhe të trashëgimisë (AHV/AVS).

Në vitin 2011 pasuritë e trashëguara kanë përbërë 13 për qind të të gjitha të ardhurave në Zvicër, ose më shumë se dyfishi i vitit 1975