Alarmante: 2 zviceranë në javë vdesin për mungesë organesh!

Aktualisht, vetëm 12 në 1 milion veta janë të gatshëm që pas vdekjes organet e tre të dhurohen për transplantim

Statistikat janë shqetësuese: 2 persona në javë vdesin në Zvicër në pritje të një organi për transplantim. Kjo tregon qarte gjendjen alarmante në këtë fushë, pasi që në Zvicër çdo vit vjen duke u zvogëluar numri i dhuruesve të organeve.

Gjendja është kaq serioze sa që Qeveria Federale në bashkëveprim me kantonet kanë vendosur të ndërmarrin diçka për ta ndryshuar atë, shkruan srf.ch. Fondacioni “Swisstransplant” ka përpunuar në këtë drejtim një plan masash që duhen ndërmarrë për sensibilizimin e popullatës me gjendjen.

Me këto masa që do të zhvillohen me moton “Më shumë organe për transplancione” qeveria dhe kantonet synojnë që deri në vitin 2018 të arrijnë që ratën e dhurimeve të organeve (pas vdekjes së dhuruesit) ta rrisin në 20 dhurues në 1 milion banorë, transmeton albinfo.ch. Kjo do të ishte një rritje prej 60 për qind në krahasim me vitin 2012.

Sipas Pierre-Yyves Maillard, kryetar i fondacionit “Swisstransplant” gjatë vitit të kaluar në Zvicër në listat e pritjes për një organ të dhuruar kanë pritur 1370 persona. Prej tyre mesatarisht kanë ndërruar jetë deri në 2 persona në javë, pasi që kishin pritur më kot se dikush do t`u dhuronte një organ.

Aktualisht, vetëm 12 në 1 milion veta janë të gatshëm që pas vdekjes organet e tyre të dhurohen për transplantim.