Sveçla: Serbia po shkel hapësirën ajrore të Kosovës përmes dronëve; po hetohet bashkë me KFOR-in

Ministri në detyrë i Punëve të Brendshme i Kosovës, Xhelal Sveçla, njoftoi se kohët e fundit Serbia ka kryer shkelje të hapësirës ajrore të Kosovës duke përdorur dronë.

“Vazhdimisht jemi përballur me kërcënime nga Serbia. Kohët e fundit, janë regjistruar disa lëvizje të paautorizuara në hapësirën tonë ajrore nga dronë që kalojnë përkohësisht mbi territorin tonë,” tha Sveçla në një intervistë për KTV.

Ai shtoi se janë evidentuar disa raste të dronëve serbë mbi Kosovë, por nuk ka arsye për panik.

“Këto incidente janë duke u hetuar profesionalisht në bashkëpunim me KFOR-in dhe shërbimet partnere. Kur të kemi informacion më të plotë, do ta ndajmë me publikun. Për momentin, nuk ka arsye që qytetarët e Kosovës të shqetësohen. Të gjitha institucionet janë në krye të detyrës. Megjithatë, dua të theksoj natyrën e veprimeve të institucioneve serbe, përfshirë edhe paradat ushtarake, që përbëjnë një kërcënim për Republikën e Kosovës. Shumica e vendeve fqinje të Serbisë janë pjesë e NATO-s, si Kroacia, Mali i Zi, Shqipëria dhe Bullgaria, dhe nuk mund të cenohen nga Serbia. Potencialisht, Bosnja e Hercegovina dhe Republika e Kosovës janë më të prekshmet, për shkak të situatave të brendshme politike dhe politikave hegjemone serbe që përpiqen të ndikojnë në rajon,” tha ai.