Studim: Ndërhyrjet qeveritare po ulin ofertën e banesave dhe po rrisin qiratë

Ndërhyrjet qeveritare ngushtojnë tregun e banesave dhe rrisin qiratë, tregon një studim i ri

Një studim i publikuar nga Universiteti i Shkencave të Aplikuara të Zvicrës Veriperëndimore (FHNW) ka zbuluar se rregulloret e rrepta qeveritare në sektorin e ndërtimit po ndikojnë negativisht në tregun e banesave, duke çuar në ulje të ofertës dhe rritje të qirave, përcjell albinfo.ch.

Sipas studiuesve, ligjet e shumta mjedisore dhe urbanistike, përfshirë ato që rregullojnë nivelin e lejuar të zhurmës në zonat ku planifikohen projekte të reja banimi, po e bëjnë procesin e ndërtimit më kompleks, më të ngadalshëm dhe më të kushtueshëm. Si rezultat, po ndërtohen më pak njësi të reja, gjë që e përkeqëson edhe më tej mungesën e banesave në treg.

Kjo situatë ka pasoja të drejtpërdrejta për qytetarët: qiratë janë duke u rritur, veçanërisht për personat që kërkojnë një apartament të ri, të cilët përballen me konkurrencë më të madhe dhe oferta gjithnjë e më të kufizuar.

Studimi nënvizon se ndërhyrjet e tilla, edhe pse shpesh bëhen me qëllime të mira, si mbrojtja e mjedisit ose standardet akustike, po krijojnë efekte të padëshiruara në tregun e banesave, duke e bërë jetesën më të shtrenjtë dhe duke e kufizuar ndjeshëm disponueshmërinë e banesave për popullsinë zvicerane.

---