80 azilkërkues vendosen në bunkerin nëntokësor

Fluksi i refugjatëve të cilët gjatë muajve të fundit kanë kërkuar azil në Zvicër, ka ardhur duke u rritur. Në këtë mënyrë kantonet kanë ardhur në kufi të kapaciteteve të tyre strehuese. Në kantonin e Solothurnit, për shembull, si rezultat i shterimit të kapaciteteve në fjalë, azilkërkuesit po strehohen edhe në strehimore nëntokësore.

Konkretisht, së fundi tetëdhjetë kërkues të azilit janë vendosur në një bodrum që më parë ka shërbyer si bunker për mbrojtje nga sulmet ajrore.

Vetëm në këtë kanton për çdo javë paraqitet nevoja e strehimit të 30 refugjatëve të rinj, ndërkohë që 95 për qind të të gjitha kapaciteteve në dispozicion janë shteruar.