Lajme

Sonte fillon festivali “Tri Net Film Fest”, në Freienstein

Platforma mediale albinfo.ch është partner medial i “Tri Net Film Fest”

Pasionantët e filmit të shkurtër do të kenë një mundësi të veçantë për të përjetuar artin e kinemasë, pasi “Tri Net Film Fest” po kthehet për herë të katërt, kësaj radhe në Freienstein, transmeton albinfo.ch.

Ky festival i njohur nën moton “Shkurt në ekran, gjatë në kujtesë”, do të zhvillohet më 4, 5 dhe 6 dhjetor 2025 në sallën e Neues Kino, në adresën Striekgasse 1, 8427 Freienstein.

Festivali ofron një mundësi unike për të njohur krijime të reja të regjisores dhe regjisorëve të rinj nga Shqipëria, Kosova dhe më gjerë, duke prezantuar një gamë të gjerë zhanresh, nga dramat intensive te komeditë që ngrohin zemrën. Organizatorët premtojnë një atmosferë magjike, ku çdo shikues do të mund të zhytet në botën e filmit të shkurtër dhe të largohet me përjetime që mbeten gjatë në kujtesë.

Pjesëmarrësit e interesuar mund të rezervojnë datat dhe të sigurojnë vendet e tyre përmes faqes zyrtare të festivalit, duke mos humbur kështu mundësinë për të qenë pjesë e një prej ngjarjeve më të rëndësishme të filmit të shkurtër në rajon./Albinfo.ch

Këta janë filmat që do të shfaqen sonte, në natën e parë të festivalit:

“Një histori e parrëfyer” – Sara Hoxhaj
“Emri im është Sonila” – Suela Bako
“Në sytë e Xhelos” – Besa Tusha
“Mbijetesa dhe shkolla” – Ilir Kabashi
“Atje ku qershitë janë gjithmonë të kuqe” – Shqipe Bebe Krasniqi

Vendi: Neues Kino, Striekgasse 1, 8427 Freienstein.

Koha: Sonte, 04. 12. Dyert hapen nga ora 18.30. Shfaqja e filmave: 19.30

 Rezervoni biletat këtu:
(D. R.)