Qendrat e azilit si strehim falas gjatë eventeve të mëdha: A po keqpërdoret sistemi në Zvicër?

(KEYSTONE/Christian Beutler)

Një raport i ri ngre shqetësimin se qendrat federale të azilit në Zvicër po keqpërdoren si strehim falas, veçanërisht gjatë fundjavave dhe ngjarjeve të mëdha si Street Parade apo koncertet e Taylor Swift në Cyrih.

Sipas një analize të realizuar nga zyra kërkimore Ecoplan, numri i aplikimeve për azil rritet ndjeshëm në këto periudha. Raporti sugjeron se disa persona paraqesin kërkesa për azil vetëm për të kaluar natën në qendrat e azilit, duke u larguar sërish pas përfundimit të eventeve.

Rritje e ndjeshme gjatë eventeve të mëdha

Të dhënat tregojnë se gjatë fundjavëve verore në Qendrën Federale të Azilit në Cyrih regjistroheshin deri në 15 kërkesa për azil. Gjatë Street Parade, ky numër u rrit deri në 75 aplikime. Një rritje e ngjashme u shënua edhe gjatë koncerteve të Taylor Swift. Shumica e aplikuesve, sipas raportit, vinin nga vendet e Afrikës së Veriut.

Shifrat e përgjithshme të azilit

Deri në fund të nëntorit 2025, në Zvicër janë regjistruar 23.767 kërkesa për azil, që përfaqëson një rënie prej 8.1 për qind krahasuar me të njëjtën periudhë të vitit të kaluar.

Gjatë vitit 2024, rreth 4.500 kërkesa u cilësuan si të pabazuara, ndërsa 2.337 persona e braktisën procedurën e azilit pas aplikimit, veçanërisht në rastet kur transferoheshin nga një kanton në tjetrin.

Masat për të frenuar abuzimin

Sekretariati Shtetëror për Migracionin (SEM) ka nisur masa për të parandaluar këtë fenomen. Sipas zëdhënësit Samuel Wyss, janë futur procedura të përshpejtuara 24-orëshe për azilkërkuesit nga Afrika e Veriut, si dhe regjistrimi i gjurmëve të gishtërinjve edhe gjatë natës dhe fundjavave. Kjo do të thotë se askush nuk mund të qëndrojë në një qendër federale azili pa u identifikuar zyrtarisht.

Po ashtu, pas një marrëveshjeje mes autoriteteve federale, kantoneve dhe komunave, pritet të futet edhe një fazë paraprake verifikimi, për të vlerësuar nëse ekzistojnë kushtet minimale për paraqitjen e një kërkese për azil, përpara se ajo të regjistrohet zyrtarisht.

Autoritetet theksojnë se qëllimi i këtyre masave nuk është kufizimi i të drejtës për azil, por mbrojtja e sistemit nga keqpërdorimet dhe garantimi i ndihmës për ata që kanë realisht nevojë.