Rinesa Krasniqi nis një hap të ri në karrierë brenda Policisë së Lucernit

Nga data 5 janar 2026, zyrtarja policore Rinesa Krasniqi do të nisë një hap të ri në zhvillimin e saj profesional brenda Policisë së Kantonit të Lucernit, duke u angazhuar në një projekt pilot tre-mujor në shërbimin e brendshëm dhe të denoncimeve në stacionin policor të Ebikonit.

Deri më tani, Krasniqi ka ushtruar detyrën si asistente policore e sigurisë në shërbimin në terren, ndërsa projekti i ri synon të vlerësojë rikthimin dhe funksionalitetin e këtij pozicioni në shërbimin e brendshëm, i cili kishte qenë i pezulluar më herët, transmeton albinfo.ch.

Sipas njoftimit të saj publik, pjesëmarrja në këtë projekt pilot përbën një mundësi të rëndësishme për zgjerimin e kompetencave profesionale, si dhe për fitimin e përvojave të reja në trajtimin e rasteve dhe procedurave administrative brenda policisë.

Ajo shprehet e motivuar që të kontribuojë drejtpërdrejt në zhvillimin dhe avancimin e këtij funksioni, duke theksuar se detaje dhe përvoja të tjera nga ky angazhim do të ndahen në vijim.

Ky projekt pilot vlerësohet si pjesë e përpjekjeve të Policisë së Lucernit për të nxitur zhvillimin e brendshëm profesional, fleksibilitetin në karrierë dhe avancimin e stafit përmes roleve të ndryshme brenda institucionit.