SBB jep miliona për sigurinë në stacione dhe trena

(KEYSTONE/Michael Buholzer)

Hekurudhat Federale Zvicerane (SBB) i kanë dhënë kompanisë private të sigurisë Securitas një kontratë trevjeçare me vlerë dhjetëra miliona franga, për garantimin e sigurisë në stacionet hekurudhore dhe në trenat në të gjithë Zvicrën.

Sipas zëdhënëses së SBB-së, Sabrina Schellenberg, kontrata parashikon që Securitas të sigurojë kryesisht një prani parandaluese në trena dhe në zona stacionesh. Përveç kësaj, kompania menaxhon edhe një qendër operative në rajonin e Cyrihut, e cila koordinon dhe shpërndan patrullat e sigurisë në terren, transmeton albinfo.ch.

Bashkëpunim për sigurinë

Siguria në stacione dhe trena nuk sigurohet vetëm nga punonjësit e Securitas, por edhe nga policia e transportit e SBB-së si dhe nga Transsicura, një filial i SBB-së. Policia e transportit, me rreth 200 punonjës, ka kompetenca policore në situata të përshkallëzuara dhe është e pajisur me armë shërbimi, sprej piper dhe shkop gome.

“Siguria është një detyrë e përbashkët”, thekson Schellenberg, duke nënvizuar rëndësinë e bashkëpunimit mes të gjitha organizatave partnere në trena dhe rreth stacioneve.

Oferta më e favorshme

Securitas ka punuar për SBB-në për 16 vite, kryesisht në zonën e rrjetit të transportit të Cyrihut. Meqë kontrata aktuale përfundon në pranverë, shërbimet u nxorën sërish në tender publik. “Securitas paraqiti ofertën më të favorshme dhe për këtë arsye fitoi sërish kontratën”, shpjegon zëdhënësja e SBB-së.

Në platformën zyrtare të tenderimeve Simap, SBB thekson se vendimtare kanë qenë vlerësimet e larta në të gjitha kriteret cilësore të dhënies së kontratës.

Dhunë dhe vandalizëm në rritje

Kohët e fundit, incidente të shpeshta dhune dhe vandalizmi në stacionet hekurudhore, sulme ndaj stafit të SBB-së dhe dëmtime të trenave kanë shkaktuar reagime të forta publike. Sindikatat hekurudhore dhe vetë SBB prej kohësh zhvillojnë fushata për të tërhequr vëmendjen ndaj rritjes së dhunës ndaj personelit të trenave.

Rrezikohen jo vetëm punonjësit, por edhe pasagjerët, veçanërisht nga tifozë sportivë të pakontrolluar apo persona të dehur dhe agresivë.

Me këtë kontratë të re, SBB synon të forcojë më tej masat parandaluese dhe të rrisë ndjenjën e sigurisë për udhëtarët në të gjithë vendin.