Legjenda e Zvicrës merr drejtimin e FC Basel

Një kapitull i ri për FC Basel me Stephan Lichtsteiner trajner

Legjenda e futbollit zviceran, Stephan Lichtsteiner, është emëruar trajner i ri i FC Basel. Emërimi i 42-vjeçarit është bërë të hënën, menjëherë pas shkarkimit të Ludovic Magninit nga posti i trajnerit, shkruan albinfo.ch.

Lichtsteiner ka shprehur bindje të plotë në projektin afatgjatë të klubit dhe ka theksuar se marrja e kësaj detyre ishte një vendim i natyrshëm për të.

“Jam shumë i bindur për projektin afatgjatë në FC Basel dhe për këtë arsye jam i kënaqur që jam pjesë e tij tani e tutje. Ishte e qartë për mua që doja ta merrja përsipër këtë sfidë në këtë klub të madh. Jam i sigurt se së bashku mund të arrijmë shumë në Basel”, ka deklaruar ai.

Ish-kapiteni i Zvicrës nuk është i panjohur për ambientin e Baselit. Ai ka punuar më herët si trajner i grupmoshave të reja të klubit, ndërsa së fundi drejtoi skuadrën zvicerane FC Wettswil-Bonstetten.

Si futbollist, Lichtsteiner ka pasur një karrierë të jashtëzakonshme, duke luajtur për klube të njohura evropiane si Grasshopper, Lille, Lazio, Juventus, Arsenal dhe Augsburg. Me fanellën e Zvicrës ai ka zhvilluar 108 ndeshje ndërkombëtare.

Ai është kujtuar gjithashtu për momentin simbolik në Botërorin “Rusia 2018”, kur në fitoren 2:1 të Zvicrës ndaj Serbisë festoi me shqiponjën dykrenare pas golit të Granit Xhakës. Në atë ndeshje shënoi edhe Xherdan Shaqiri, i cili aktualisht është kapiten i FC Basel./Albinfo.ch

---