Sukses në Norvegji, Ari Bajgora nominohet për katër çmime në Spellemannprisen

Artisti me origjinë shqiptare në garë për çmimet më prestigjioze të muzikës norvegjeze

Reperi 21-vjeçar me origjinë shqiptare, Ari Bajgora, është ndër artistët më të nominuar këtë vit në çmimet prestigjioze norvegjeze të muzikës, Spellemannprisen, duke konfirmuar rritjen e tij të shpejtë në skenën muzikore të Norvegjisë, transmeton albinfo.ch.

Artisti, i cili jeton në zonën e Grünerløkka në Oslo, është nominuar në katër kategori kryesore: Kënga e Vitit, Kompozitori i Vitit, Hip Hop dhe Publikimi i Vitit. Nominimet e shumta e vendosin atë në qendër të vëmendjes së industrisë muzikore norvegjeze për vitin aktual.

Bajgora ka theksuar se kjo arritje ka një domethënie të veçantë për familjen e tij, duke kujtuar se prindërit e tij u vendosën në Norvegji si refugjatë 26 vjet më parë. Sipas tij, suksesi përfaqëson jo vetëm një triumf personal, por edhe një histori integrimi dhe përkushtimi, transmeton tutje albinfo.ch. 

“Është interesante të tregosh se mund të shkruash mirë edhe në norvegjisht, edhe pse nuk vjen nga një familje norvegjeze”, është shprehur artisti.

Ari Bajgora ka nisur të interpretojë që në moshën 11-vjeçare në parkun Sofienbergparken në Oslo, ku performonte dhe mblidhte fonde për njerëzit në nevojë. Që atëherë, ai ka ndërtuar gradualisht profilin e tij artistik, duke u shndërruar në një nga zërat më të spikatur të brezit të ri në hip hop-in norvegjez.

Ndër këngët e tij më të njohura janë “Løsningsorienterte” (2023), “Situasjon” (2024) dhe “Falle og slå seg” (2025), kjo e fundit duke u renditur si kënga norvegjeze më e dëgjuar e vitit. Përveç nominimeve në Spellemannprisen, ai ka qenë gjithashtu i nominuar në çmimet P3 Gull dhe për Zbulimin e Vitit në vitin 2024.

Me një stil autentik dhe tekstet e tij të shkruara në norvegjisht, Ari Bajgora po konsolidohet si një fenomen i ri i muzikës në Norvegji, duke dëshmuar se talenti dhe përkushtimi kapërcejnë kufijtë kulturorë./Albinfo.ch

---