Për shumicën e gjermanëve, është i pranueshëm fluksi i madh i refugjatëve

Përqindja e parë (60%) është më e lartë se ajo që ishte prezantuar nga sondazhi i realizuar në korrik të këtij viti kur përqindja ishte 54%

Një shumicë e gjermanëve e konsiderojnë të pranueshëm numrin e madh të refugjatëve që kohëve të fundit po vijnë në Gjermani. Plot 60 për qind e të anketuarve kanë shprehur këtë qëndrim del nga sondazhi i publikuar të premten nga “Politbarometer” i televizionit ZDF. Ndërsa të papranueshëm këtë numër e konsiderojnë 37%, raporton agjencia gjermane e lajmeve dpa.

Përqindja e parë (60%) është më e lartë se ajo që po ky televizion e kishte prezantuar nga sondazhi i realizuar në korrik të këtij viti. Me atë rast 54% të gjermanëve e konsideronin të përballueshëm numrin e madh të refugjatëve në vendin e tyre.

Ndërkaq pothuaj ¾ e të anketuarve mendojnë se duhet të ketë dallime sa i takon trajtimit (strehimit dhe procedurës së azilit) në varësi të asaj se çfarë shansesh për qëndrim ka akëcili refugjat. Vetëm 23% janë për një trajtim të barabartë për të gjithë refugjatët.
Është interesante se një shumicë e madhe (69%) janë shprehur në favor të propozimit që këtyre refugjatëve (me pak shanse për azil) t`u jepen më pak para dhe më shumë ndihma “ne natyrë” (artikuj ushqimorë e të tjerë në vend të parave te xhepit).

26% janë kundër kësaj.

Sondazhin e ka realizuar grupi hulumtues nga Manhajmi “Wahlen”, i cili nga e marta deri të pemten ka anketuar përmes telefonit 1251 qytetarë me të drejtë vote.