Ahmeti: Gjuha shqipe nuk është dhe nuk do të jetë kurrë subjekt negociatash

Kryetari i BDI-së, Ali Ahmeti, ka reaguar përmes një letre të hapur lidhur me debatet për statusin e gjuhës shqipe në Maqedoninë e Veriut. Ai thekson se çështjet e tilla nuk duhet të trajtohen impulsivisht, por me përgjegjësi shtetërore.

Ahmeti nënvizon se shtetet e forta bazohen në parime të qarta dhe respekt të ndërsjellë, dhe se relativizimi i tyre krijon debate të panevojshme.

“Ka tema që nuk i përkasin partive apo garave politike, por janë pjesë e marrëveshjes për të jetuar bashkë, të barabartë, në një shtet të përbashkët dhe evropian. Një prej tyre është statusi i gjuhës shqipe si gjuhë zyrtare”, shkruan ai.

Ai shton se barazia nuk është thjesht slogan, por parim politik dhe moral, dhe se forca e shtetit matet nga respekti për çdo qytetar dhe popull.

“Një shtet bëhet i fortë kur çdo qytetar ndihet i respektuar dhe përfaqësuar me dinjitet. Gjuha nuk është vetëm mjet komunikimi, por shprehje e identitetit, dinjitetit dhe barazisë kushtetuese”, thekson Ahmeti.

Kreu i BDI-së nënvizon se gjuha shqipe nuk mund të jetë kurrë objekt negociatash, duke e lidhur me themelet e shtetit dhe Marrëveshjen e Ohrit. Ai kujton se shqipja nuk është privilegj, por e drejtë kushtetuese e fituar.

Ahmeti shton se shqiptarët gjithmonë kanë respektuar gjuhën maqedonase dhe identitetin maqedonas, duke mbështetur një shtet të përbashkët dhe evropian.

Ai paralajmëron se çdo tentativë për të kufizuar përdorimin e gjuhës shqipe minon rendin kushtetues dhe kohezionin e vendit. Gjithashtu, ai shpreh shqetësim për qasjet në Gjykatën Kushtetuese, të cilat sipas tij nuk janë në përputhje me frymën e Marrëveshjes së Ohrit.

Ahmeti citon edhe Komisionin e Venedikut, i cili nuk ka konstatuar shkelje kushtetuese për ligjin e gjuhëve.

Ai përfundon me një mesazh të qartë: “Të drejtat e fituara nuk negociohen. Çdo përpjekje për kufizim është e rrezikshme për stabilitetin e vendit. Nuk ka të ardhme pa barazi, nuk ka barazi pa dinjitet, dhe nuk ka dinjitet pa gjuhën shqipe si gjuhë zyrtare”.

Ky reagim vjen pas riaktivizimit të shqyrtimit të Ligjit të Gjuhës nga Gjykata Kushtetuese e Maqedonisë së Veriut.