Aplikacion i ri mund të thjeshtojë pagesat në transportin publik në Zvicër

Sistemi “Bibo” përdor teknologjinë Bluetooth për të regjistruar automatikisht udhëtimet dhe për të llogaritur tarifën përfundimtare në fund të rrugës.

Një aplikacion i ri mund të thjeshtojë ndjeshëm pagesat në transportin publik në Zvicër, duke eliminuar nevojën për bileta tradicionale apo skanime manuale, përcjell albinfo.ch.

I quajtur “Bibo”, sistemi automatik i tarifimit përdor teknologjinë Bluetooth për të zbuluar automatikisht kur një pasagjer është në autobus, tren apo tramvaj, dhe më pas llogarit çmimin e udhëtimit në fund të tij.

Sipas grupit të industrisë SwissPass Alliance, projekti pilot për këtë aplikacion të ri do të nisë në fund të muajit prill dhe do të përfshijë rreth 3,000 pjesëmarrës.

Qëllimi i testimit është të vlerësohet saktësia e regjistrimit të udhëtimeve dhe llogaritjes së tarifave, si dhe të mblidhen mendimet e përdoruesve lidhur me funksionimin e sistemit të ri.

---