Honda shënon humbjen e parë vjetore që nga 1955, tërhiqet nga ambiciet për makinat elektrike

Pas ndryshimeve në politikat amerikane për emetimet dhe heqjes së kreditit tatimor, prodhuesit globalë po ulin investimet në EV

Industria globale e automobilave po përballet me një kthesë të fortë nga planet për automjetet elektrike (EV), ndërsa një nga kompanitë më të mëdha japoneze, Honda, ka raportuar humbjen e saj të parë vjetore që nga viti 1955, përcjell albinfo.ch.

Sipas raportimit të CNN, Honda dhe prodhues të tjerë të mëdhenj kanë nisur të reduktojnë ambiciet për EV pas ndryshimeve të administratës Trump në rregullat amerikane për emetimet dhe pas heqjes së kreditit tatimor prej 7,500 dollarësh për blerësit e makinave elektrike në SHBA. Shitjet e EV ranë ndjeshëm pas përfundimit të këtij krediti në shtator, ndërsa edhe rritja e çmimeve të benzinës nuk solli rritje të dukshme të kërkesës për automjete elektrike.

Prodhuesit e makinave kishin investuar miliarda dollarë duke u bazuar në pritjet për rregulla shumë më të ashpra të emetimeve në SHBA, por këto masa u zbutën pasi administrata Trump hoqi politikat e mëparshme të vendosura nga administrata Biden dhe eliminoi gjobat e larta financiare për shkelje të mundshme.

Si rezultat, shumë kompani kanë rikthyer fokusin te kamionët dhe SUV-të me motorë benzine, të cilët vazhdojnë të sjellin fitime më të mëdha. Megjithatë, ky ndryshim strategjie është shoqëruar me kosto të mëdha, pasi investimet në EV janë detyruar të zhvlerësohen.

Për vitin fiskal që përfundoi në mars, Honda raportoi një goditje prej 1.6 trilion jenësh (rreth 10 miliardë dollarë) në fitimet e saj, duke e kthyer një fitim të mundshëm prej 7.4 miliardë dollarësh në një humbje neto prej 403.3 miliardë jenësh, ose rreth 2.6 miliardë dollarë.

Honda gjithashtu paralajmëroi se gjatë vitit fiskal aktual pret një tjetër zhvlerësim të investimeve në EV, ndonëse jo në nivel që do të shkaktonte një humbje tjetër vjetore.

Ky zhvillim vjen pas raporteve të ngjashme edhe nga kompani të tjera të mëdha. General Motorsraportoi një kosto prej 7.2 miliardë dollarësh në vitin 2025 për tërheqjen nga EV, ndërsa Ford njoftoi një goditje prej 17.4 miliardë dollarësh. Ndërkohë, Stellantis raportoi një kosto prej 25.4 miliardë eurosh, ose rreth 29.7 miliardë dollarë, duke reflektuar presionin financiar të kësaj strategjie.

Edhe pse GM arriti të mbetet në fitim, Ford dhe Stellantis raportuan humbje neto për vitin 2025, ndërsa Ford pret edhe kosto shtesë gjatë këtij viti.

Megjithatë, prodhuesit nuk po heqin dorë plotësisht nga automjetet elektrike. Në Evropë dhe Azi vazhdojnë të jenë në fuqi rregulla më të ashpra për emetimet, ndërsa disa shtete amerikane, përfshirë Kaliforninë, synojnë ndalimin e shitjes së makinave me benzinë deri në vitin 2035, edhe pse Kongresi amerikan po tenton ta bllokojë këtë plan.

Në të njëjtën kohë, prodhuesit perëndimorë po shprehin shqetësim për konkurrencën në rritje nga kompanitë kineze, të cilat janë të fokusuara kryesisht në automjete elektrike dhe po forcojnë pozicionin e tyre në tregjet globale./Albinfo.ch

---