Taksë e veçantë për të huajt? Ideja mund të diskutohet në Bernë

Propozimi parasheh që emigrantët e rinj të paguajnë deri në 25 franga shtesë në ditë

Një propozim i ri për vendosjen e një takse të veçantë ndaj të huajve të sapoardhur në Zvicër mund të hyjë së shpejti në debat politik në Bernë.

Sipas raportimeve, Partia Liberale pritet ta ngrejë çështjen në parlament, duke argumentuar se masa duhet të përfshihet në negociatat e reja mes Zvicrës dhe Bashkimit Evropian, transmeton albinfo.ch.

Ideja parasheh që emigrantët e rinj të paguajnë një taksë shtesë prej 10 deri në 25 franga në ditë për një periudhë prej tre ose pesë vitesh. Një alternativë tjetër do të ishte pagesa e një tarife shtesë prej 3% të të ardhurave për 11 vjet.

Sipas mbështetësve të planit, kjo do të funksiononte ngjashëm me taksën që paguajnë shtetasit zviceranë që nuk kryejnë shërbimin ushtarak. Propozimi mund t’i sillte shtetit rreth 1 miliard franga në vit.

Megjithatë, qeveria federale ka sinjalizuar se zbatimi i një mase të tillë do të ishte juridikisht i komplikuar, sidomos për qytetarët e Bashkimit Evropian. Sipas rregullave të lëvizjes së lirë, shtetasit e BE-së nuk mund të trajtohen ndryshe nga qytetarët vendas.

Debati pritet të ndezë edhe më shumë diskutimet për emigracionin në Zvicër, në një periudhë kur vendi po përgatitet për referendumin “No to 10 million” dhe kur çështjet e popullsisë, fuqisë punëtore dhe kostove publike janë bërë tema qendrore politike.

---