Kosova rrezikon të humbë mbi 250 milionë euro nga Plani i Rritjes i BE-së

Afatet e reformave dhe bllokadat politike rrezikojnë disbursimin e fondeve të BE-së për Kosovën

Kosova mund të humbë mbi 250 milionë euro nga Plani i Rritjes i Bashkimit Evropian, nëse nuk arrin të përmbushë kushtet e përcaktuara brenda afateve të caktuara kohore, sipas burimeve të Komisionit Evropian, përcjell albinfo.ch.

Ndërkohë që Shqipëria, Maqedonia e Veriut dhe Mali i Zi kanë përfituar pagesa nga kësti i tretë i këtij plani, Kosova ende nuk ka dorëzuar kërkesën për disbursim të mjeteve, përveç parafinancimit fillestar.

Sipas të dhënave nga BE-ja, vendi rrezikon të humbë mbi 90 milionë euro nëse deri në fund të qershorit nuk raporton për përmbushjen e 13 hapave të reformave të kërkuara. Një tjetër afat në fund të vitit përfshin 27 hapa shtesë, që mund të çojnë në humbjen e rreth 165 milionë eurove të tjera.

Në total, mosrealizimi i kushteve mund të sjellë humbje deri në 256 milionë euro për Kosovën. Komisioni Evropian ka paralajmëruar se vonesat në zbatimin e reformave dhe bllokadat politike të brendshme po rrezikojnë përdorimin e fondeve të Planit të Rritjes në disa vende të rajonit./Albinfo.ch

---