OBSH: Vaksina kundër shpërthimit të Ebolës mund të vonohet deri në 6–9 muaj

Organizata Botërore e Shëndetësisë (OBSH) ka bërë të ditur se dozat e vaksinës kundër virusit Bundibugyo, i cili po shkakton një shpërthim të Ebolës në Afrikën Qendrore, nuk pritet të jenë të gatshme për përdorim për rreth gjashtë deri në nëntë muaj.

Drejtori i përgjithshëm i OBSH-së, Dr. Tedros Adhanom Ghebreyesus, deklaroi gjatë një konference për shtyp mbi situatën në Republikën Demokratike të Kongos dhe Ugandë se numri i viktimave ka arritur në 139 dhe mund të rritet më tej, pasi rastet e dyshuara po shtohen çdo ditë.

Sipas zyrtarëve, shpërthimi mund të ketë nisur muaj më parë, ndërsa situata e pasigurisë në provincën Ituri, ku dhjetëra mijëra njerëz janë zhvendosur për shkak të konfliktit të armatosur, po e vështirëson gjurmimin dhe kontrollin e sëmundjes.

OBSH theksoi gjithashtu se mungesa e personelit shëndetësor në zonë po pengon ofrimin e kujdesit dhe mbikëqyrjes së duhur. Për më tepër, sëmundje të tjera si malaria dhe tifoja, që kanë simptoma të ngjashme me Ebolën në fazat e hershme, po e bëjnë edhe më të vështirë diagnostikimin e shpejtë.

Ekspertja e OBSH-së, Dr. Vasee Moorthy, tha se vaksina më premtuese kundër këtij lloji të Ebolës përdor një platformë të ngjashme me vaksinat kundër llojit Zaire. Megjithatë, ajo nuk është ende e disponueshme për prova klinike dhe procesi mund të zgjasë 6–9 muaj.

Një tjetër kandidat vaksinash, i bazuar në teknologjinë e Universitetit të Oksfordit (e përdorur edhe në vaksinën e AstraZeneca kundër Covid-19), mund të jetë gati për prova brenda 2–3 muajsh, por ende ka pasiguri për efektivitetin e tij.

Shpërthimi u raportua nga autoritetet shëndetësore afrikane të premten, ndërsa OBSH e shpalli atë një emergjencë shëndetësore me shqetësim ndërkombëtar të dielën në mëngjes.