Gjeografia ndikon në arsimim në Zvicër, dallime të mëdha mes qyteteve dhe lagjeve

Të dhënat e FSO-së tregojnë se niveli i arsimit pas-sekondar ndryshon ndjeshëm sipas vendbanimit

Vendbanimi luan rol të rëndësishëm në nivelin e arsimimit të të rinjve në Zvicër, sipas të dhënave të reja të publikuara nga Zyra Federale e Statistikave (FSO), përcjell albinfo.ch.

Sipas raportit, 91.7 për qind e personave që mbushën 15 vjeç në periudhën 2010–2014 kanë arritur një kualifikim të arsimit pas-sekondar brenda dhjetë viteve.

Megjithatë, të dhënat tregojnë dallime të dukshme mes rajoneve dhe qyteteve të mëdha. Në qytete si Cyrihu (88%), Bazeli (86%) dhe Gjeneva (82%), niveli i arsimimit është më i ulët krahasuar me mesataren kombëtare.

Dallimet janë edhe më të theksuara brenda vetë qyteteve. Në Cyrih, në lagjen Langstrasse, rreth 80 për qind e të rinjve kanë përfunduar arsim pas-sekondar, ndërsa në zonën Fluntern kjo shifër arrin në 96 për qind.

Zyra Federale e Statistikave nuk ka dhënë shpjegime për arsyet e këtyre pabarazive, duke lënë të hapur debatin mbi ndikimin e faktorëve socialë dhe ekonomikë në arsimim./Albinfo.ch

---