A është e ligjshme që restorantet zvicerane të kërkojnë para për ujin e çezmës?

Është një praktikë e zakonshme në mesin e restoranteve në Zvicër që të paguajnë një tarifë për ujin që shërbehet nga çezma.

Cyrihu është qyteti më i shtrenjtë i Zvicrës, kështu që ndoshta është e arsyeshme që ngrënia (dhe pirja) në një restorant të ketë një çmim.

Një grup miqsh që darkuan në Osteria Sazio në qendër të qytetit u tronditën kur zbuluan se sa kushtonte vakti i tyre. Sipas thelocal.ch, grupi ishte i befasuar këndshëm se sa (relativisht) i lirë ishte ushqimi i tyre, 14.50 franga për një pjatë makarona që konsiderohet si çmim i mirë për qendrën e Cyrihut.

Por, ajo përshtypje pozitive u shndërrua në zemërim kur u paraqit fatura dhe doli se 2 litra ujë rubineti që ata nuk e porositën, por që u soll në tavolinën e tyre në fillim, kushtonte 40 franga, domethënë më shumë se vetë vakti, përcjell albinfo.ch.

Duke menduar se restoranti kishte bërë një gabim, grupi thirri kamerieren përsëri. Ajo konfirmoi, megjithatë, se çmimi ishte i saktë; 40 franga për dy litra ujë.

Menaxheri i restorantit ka thënë se edhe pse uji vinte nga rubineti i kuzhinës, ai ishte i filtruar dhe i ftohur, gjë që, sipas tij, justifikonte çmimin e tij, ndërsa ai tha gjithashtu se nëse klientët porosisin verë me vaktin e tyre, uji është falas.

Për më tepër, çmimi i fryrë i ujit kompenson ushqimin e lirë, si dhe qiranë e lartë dhe pagat mbi mesataren e stafit të tij, kostoja e të dyjave me sa duket u kalohet klientëve që nuk dyshojnë nëpërmjet ujit.

A është kjo e zakonshme?

Shumë restorante në Zvicër kërkojnë pagesë për ujë, megjithëse zakonisht jo më shumë se 10 franga për litër, dhe shpesh më pak se kaq.

Arsyeja, sipas Swissrest, grup ombrellë për disa qindra restorante në zonën gjermanishtfolëse të Zvicrës, është se uji është “pjesë e shërbimit të mikpritjes”.

“Ju e merrni ujin në një gotë që duhet të lahet dhe të zëvendësohet kur thyhet, dhe ju jeni duke ngrënë në një mjedis të këndshëm. Pronari i restorantit duhet të paguajë qiranë, plus shpenzimet e ngrohjes dhe energjisë elektrike”, shpjegon grupi.

Megjithatë, “shumë restorante ende shërbejnë ujë rubineti, veçanërisht në lidhje me kafe ose porosi të tjera, falas si një gjest vullneti i mirë për mysafirët e tyre”.

Po, por a është e ligjshme kjo praktikë?

Në 25 kantone është. Ticino është i vetmi kanton që ka një ligj që detyron restorantet t’u shërbejnë klientëve një gotë ujë falas me vaktet e tyre kryesore.

Ju mund të argumentoni se 40 franga është shumë për 2 litra ujë të thjeshtë rubineti, dhe do të kishit të drejtë.

Megjithatë, restorantet kanë të drejtë të vendosin çmimet e tyre për ushqimet dhe pijet që shërbejnë. Pra, një çmim prej 40 frangash mund të jetë i paarsyeshëm, por nuk është i paligjshëm.

Megjithatë, Sara Stalder, drejtore e Fondacionit për Mbrojtjen e Konsumatorit, tha për 20 Minutes se Osteria Sazio duhet të informojë klientët për këtë kosto dhe t’i lërë ata të vendosin nëse duan që uji të sillet në tryezën e tyre apo jo.

---