A njihet martesa e huaj në Zvicër?

Ndoshta ju dhe bashkëshorti/ja juaj jeni shtetas të huaj që jeni martuar jashtë vendit. Ose ndoshta jeni zviceran/e, por keni vendosur të martoheni jasht vendit. A do të jetë e vlefshme martesa juaj në Zvicër?

Të thuash “Po” nënkupton jo vetëm një jetë të tërë lumturie (nëse jeni me fat), por edhe një numër detyrash administrative, siç është raportimi i ndryshimit të statusit, mbiemrit tuaj të ri dhe adresës (nëse ka) në administratën komunale, autoritetet tatimore kantonale, punëdhënësin tuaj, bankën tuaj, postën dhe kompanitë e sigurimeve.

Nëse keni ndryshuar mbiemrin tuaj pas martesës, duhet të kërkoni edhe një pasaportë të re, kartë identiteti dhe patentë shoferi, transmeton albinfo.ch.

E gjithë kjo kërkohet nga njerëzit me vendbanim në Zvicër që janë martuar këtu,  pavarësisht nga kombësia e tyre.

Megjithatë, barra administrative është edhe më e rëndë nëse jeni martuar jashtë vendit.

Për t’iu përgjigjur pyetjes fillestare  po, martesa e lidhur jashtë vendit njihet në Zvicër, për sa kohë që është në përputhje me ligjin zviceran. Kjo vlen edhe për çiftet e të njëjtit seks.

Ky është rasti edhe nëse kërkesat në vendin e huaj ndryshojnë nga procedurat zvicerane. Por bashkimi duhet të jetë në përputhje me një ligj civil (dhe jo thjesht fetar) në atë vend.

Megjithatë, që martesa të konsiderohet e ligjshme në Zvicër, ajo së pari duhet të vërtetohet nga autoritetet zvicerane jashtë vendit, shkruan thelocal.

Si e kryeni këtë proces?

Së pari, duhet të kontaktoni ambasadën ose konsullatën zvicerane në vendin ku është zhvilluar martesa dhe të kërkoni që bashkimi të njihet.

Do t’ju duhet të paraqisni të gjitha dokumentet, siç është leja juaj e martesës dhe çdo gjë tjetër që nevojitet që procesi të përfundojë, përcjell albinfo.ch.

Misioni diplomatik do të kontrollojë saktësinë e dokumenteve, do t’i notifikojë ato dhe do t’i përkthejë ato në njërën nga gjuhët zyrtare të Zvicrës (përveç nëse janë tashmë në gjermanisht, frëngjisht ose italisht).

Dokumentet do t’i dërgohen më pas zyrës mbikëqyrëse të kantonit tuaj të origjinës ose kantonit të banimit nëse të dyja palët janë me kombësi të huaj.

Nëse plotësohen të gjitha kushtet, ai urdhëron që transkriptimi të bëhet në bazën e të dhënave Infostar, regjistrin qendror elektronik për të gjitha ngjarjet e gjendjes civile, siç janë lindjet, vdekjet, divorcet dhe, po, martesat.

Çfarë vjen më pas?

Përveç të jetuarit të lumtur përgjithmonë, ka disa detyra të tjera që duhet të kryeni nëse njëri prej jush është shtetas i huaj që vjen në Zvicër për herë të parë.

Sapo martesa juaj të njihet zyrtarisht dhe të jeni në Zvicër ligjërisht, duhet të informoni kantonin tuaj për mbërritjen tuaj.

Rregullat e ‘regjistrimit të adresës’ mund të vijnë disi surprizuese për njerëzit nga disa vende të tjera, si Shtetet e Bashkuara, ku mund të lëvizni nga një vend në tjetrin dhe të qëndroni pothuajse jashtë radarit.

Nuk është kështu në Zvicër. Autoritetet zvicerane duan të dinë se kush jeton në vendin e tyre dhe ku  veçanërisht nëse jeni i huaj.

Kur vendoseni në një shtëpi të re, keni 14 ditë për të njoftuar mbërritjen tuaj në komunën tuaj të banimit, megjithëse në disa vende afati mund të jetë më i gjatë.

Në disa kantone, mund ta bëni këtë procedurë në internet, ndërsa në të tjera duhet të paraqiteni personalisht në zyrën lokale të regjistrimit të banorëve (Einwohnerkontrolle / Contrôle des habitants / Controllo abitanti).

---